Ռուսաստանից ավելի քան 4 մլրդ դրամի անպիտան ռազմամթերքի մատակարարման քրեական գործով մեղադրանք է առաջադրվել գեներալ Մովսես Հակոբյանին։

Գլխավոր դատախազությունից հայտնում են, որ Գլխավոր շտաբի պետի ու պաշտպանության փոխնախարարի պաշտոնը զբաղեցրած Հակոբյանը մեղադրվում է պաշտոնեական անփութության համար, որն առաջացրել է խոշոր չափերի գույքային վնաս կամ այլ ծանր հետևանք։ Նրա փաստաբան Մուշեղ Ալեքսանյանը փոխանցեց, որ պաշտպանյալը չի ընդունում մեղադրանքը։

«Պարոն Հակոբյանը մեղադրանքը չի ընդունում այն պարզ պատճառով, որ իրեն մեղսագրվող արարքն իր հետ ընդհանրապես կապ չունի, իրեն մեղսագրվում է այնպիսի գործողություն, այնպիսի մեղադրանք գործողության չկատարում, որի իրավասությունն ինքը չի էլ ունեցել, իսկ այդ գործողությունը կատարված է եղել ավելի վերադաս մարմնի կողմից», - ասել է փաստաբանը:

Մինչդեռ մեղադրող դատախազ Կարեն Կարապետյանը հակառակն է պնդում՝ զենքի մատակարարման պայմանագիրը ռուսական ընկերության հետ 2016-ին կնքել է հենց պաշտպանության փոխնախարարի պաշտոնը զբաղեցրած Հակոբյանը։ Դատախազը հայտնել է, թե այդ պայմանագրով ձեռք է բերվել հետախուզության և կրակի կառավարման շարժական ռադիոտեղորոշիչ Аистёнок տեսակի ռադիոտեղորոշիչ համակարգեր։ Մեղադրողի պնդմամբ՝ դրանք անպիտան են եղել։