Հայաստանը չի կարողանա համատեղել ԵՄ և ԵԱՏՄ, ՀԱՊԿ անդամակցությունը, երկու աթոռին նստել չի ստացվի։ Երևանում՝ «Արևելք-Արևմուտք դիմակայություն» ֆորումի շրջանակում, լրագրողներին ասել է Ռուսաստանի արտգործնախարարության հատուկ հանձնարարություններով դեսպան Ռոդիոն Միրոշնիկը։

«Ռուսաստանը միշտ ընդգծել է, որ մտադիր չէ միջամտել պետությունների, այդ թվում՝ Հայաստանի ներքին գործերին։ Սակայն դժվար թե հնարավոր լինի համատեղել ՀԱՊԿ-ին, ԵԱՏՄ-ին անդամակցությունը ԵՄ-ի անդմակցության հետ։ Միաժամանակ երկու աթոռին նստել դժվար թե ստացվի», - ասել է դեսպանը՝ հավելելով, որ Մոսկվան շահագրգռված է ՀԱՊԿ-ի շրջանակներում Հայաստանի հետ հարաբերությունների խորացմամբ։

Հայաստանի խորհրդարանը մարտի 26-ին ամբողջությամբ ընդունեց Եվրամիության անդամակցության գործընթացի մեկնարկի մասին օրինագիծը: Հայաստանի փոխարտգործնախարար Պարույր Հովհաննիսյանը պարզաբանեց՝ «Օրինագիծն ինքնին չի հանդիսանում Եվրամիությանը Հայաստանի անդամակցության հայտ, այնուամենայնիվ, այն հաղորդում է Եվրամիության հետ գործընկերության գոյացումը նոր մակարդակի հասցնելու ցանկության ունեցող Հայաստանի քաղաքացիների ձգտումն ու համահունչ է բալանսավորված ու բալանսավորման արտաքին քաղաքականությանը»։

Այդուհանդերձ Մոսկվայի արձագանքը չուշացավ․ Ռուսաստանի փոխվարչապետ Ալեքսեյ Օվերչուկը հայտարարեց՝ եթե Հայաստանն անդամակցի ԵՄ-ին, Մոսկվան ստիպված կլինի վերանայել Երևանի հետ տնտեսական հարաբերությունների ողջ փաթեթը՝ շեշտելով՝ «երկիրը պետք է ընտրություն կատարի՝ միաժամանակ երկու աթոռին նստել չի հաջողվի»։