Բաքվում իրավիճակը ամբողջովին զուրկ է թափանցիկությունից եւ հստակ հայտնի չէ, թե այնտեղ ինչ է կատարվում, ֆրանսիական LE SPECTACLE DU MONDE պարբերականին տված հարցազրույցում ասել է Բաքվում պահվող Ռուբեն Վարդանյանի որդին՝ Դավիթ Վարդանյանը։

«Մեկ տարի առաջ՝ 2024 թվականի ապրիլին, երբ  հայրս հացադուլի մեջ  էր՝ ի նշան բողոքի կալանքի դեմ, երկու շաբաթ լուր չունեինք նրանից», - ասել է նա։

Նա նշել է, որ հոր հետ հաղորդակցվելու երեք տարբերակ ունեն՝ Կարմիր խաչը, ամենշաբաթյա հեռախոսազանգը եւ նամակը։ Բայց իրականում այդ երեք տարբերակն էլ բարդության հետ է կապված։

Դավիթ Վարդանյանը կարծում է, որ 2023 թվականին հոր ձերբակալությունը հատուկ տեսանկարահանելու նպատակը ռազմավարության մի մաս է։

«Նրանք ցանկանում են աշխարհասփյուռ հայերին ցույց տալ, թե ինչ կարող են անել մեզ հետ։ Բաքուն օգտագործում է հորս կերպարն ու հեղինակությունը՝ համայն աշխարհին ուղերձ հղելու համար: Դժբախտաբար, կարելի է ասել, որ դա նրանց ինչ-որ առումով հաջողվում է», - ասել է նա։

Ռուբեն Վարդանյանի դատավարությունը որդին աբսուրդի թատրոն է որակել։ Առաջադրված 44 մեղադրանքը նա «ակնհայտորեն անհիմն» է անվանել։

«Դատական վերջին լսումների ժամանակ Reuters-ի և այլ գործակալությունների լրագրողներին արգելվել է մուտք գործել դատարան: Amnesty International-ը արդեն իսկ դատապարտել է այս դատավարության  աչառու ընթացքը», - նշել է նա։

Դավիթ Վարդանյանը նշել է, որ հոր գործն իրենք չեն առանձնացնում մյուս հայ բանտարկյալներից։

«Որպեսզի Բաքուն հաջողության հասնի, նրան անհրաժեշտ է, որ բոլորը լռեն Ադրբեջանի կողմից իրականացվող ցեղասպանության մասին։ Բաքուն ցանկանում է, որ աշխարհը շարունակի այլ կողմ նայել, ուստի ամենակարևոր բանը դրա մասին խոսելն է, գրելը։ Սոցիալական ցանցերում, ռադիոյով, ամենուր: Ես գիտեմ, որ Ֆրանսիայի կառավարությունը շատ բաներ է ասում հայերին աջակցելու համար։ Պետք է խոսել Գերմանիայի, Միացյալ Թագավորության, Ամերիկայի Միացյալ Նահանգների դեսպանների հետ։ Եվ բնականաբար, պետք է հարցնել եվրոպացիներին գազի մասին», - ասել է նա։

Դավիթ Վարդանյանը նշել է, որ Սփյուռքը աջակցում է իրենց։ Շեշտում, որ գերիների հարցը կենսական նշանակություն ունի։

«Փաշինյանն ասում է, որ խնդիրը կարևոր է: Կան բաներ, որ փոքր երկիրը կարող է անել իրեն պաշտպանելու համար, օրինակ՝ ապահովել իր գերիների ազատ արձակումը: Այս պահին հույս ունենք, որ իրավիճակը կփոխվի», - ասել է նա:

Ռուբեն Վարդանյանի որդին կարծում է, որ այս իրավիճակի մասին պետք է խոսել, լուսաբանել իրավիճակը, «որպեսզի մեր գերիները մոռացության չմատնվեն»։