ՀՀ ոստիկանությունը վստահեցնում է` անձնագրային և վիզաների վարչության պետական սահմանի անցակետերում ծառայություն իրականացնող բոլոր ստորաբաժանումները, այդ թվում՝ «Զվարթնոց» օդանավակայանի բաժինը, աշխատում են շուրջօրյա ռեժիմով։ Տեղեկությունը հայտնում է ՀՀ ոստիկանության մամուլի ծառայությունը։
Նշենք, որ սոցիալական կայքի օգտատերերից մեկը, ապա նաև ԶԼՄ–ներում հրապարակում է արվել, որ «Զվարթնոց» միջազգային օդանավակայանում գիշերային չվերթերի ժամանումից հետո անձնագրային բաժանմունքում Հայաստան ժամանած օտարերկրացիներին մուտքի վիզա տրամադրելու համար աշխատակիցները տեղում չեն եղել՝ պատճառաբանությամբ, թե հուլիսի 5-ը ոչ աշխատանքային օր է։
«Սույն թվականի հուլիսի 4-ի և 5-ի հերթափոխները ծառայությունն իրականացրել և իրականացնում են ամբողջական կազմով, հերթափոխը կատարվել է սահմանված ժամին»,– նշված է հաղորդագրությունում։
Իրավապահ կառույցից նաև շեշտել են, որ Անձնագրային և վիզաների վարչության ստորաբաժանումներն իրականացնում են օրենքով վերապահված բոլոր գործառույթները՝ անկախ ոչ աշխատանքային օր լինելու հանգամանքից։
Օգտատիրոջ գրառման մեկնաբանությունների հատվածում ՀՀ ոստիկանության մամուլի խոսնակ Աշոտ Ահարոնյանը նաև նշել է, որ դեպքը մասնավոր է և ոչ ընդհանրական։ Խոսքը մի անձի մասին է, որի փաստաթղթերն ամբողջական չեն եղել և անցակետում հնարավոր չի եղել վիզա տրամադրել։
Ըստ Ահարոնյանի` անձը դիմել է e-visa էլեկտրոնային վիզա ստանալու համար, որը սպասարկում է ՀՀ ԱԳՆ-ն և ոչ մի կապ չունի ոստիկանության Անձնագրային և վիզաների վարչության հետ և ոչ աշխատանքային օր լինելու պատճառով ԱԳՆ-ում դիմումը դեռ չի քննարկվել։
